Хваля канцэртаў “За Беларусь!” дакацілася да Смаргоні напярэдадні Міжнароднага жаночага дня. 7-га сакавіка жыхары горада на працягу трох гадзін мелі магчымасць пацешыцца творчасцю Ірыны Дарафеевай, гурта “Далі” і танцавальнага ансамбля “Харошкі”.
Квіткі на канцэрт распаўсюджваліся праз БРСМ і іншыя ідэялагічныя структуры. Такім чынам, у зале прысутнічалі прадстаўнікі ўсіх дзяржаўных устаноў горада. Перад канцэртам Віктар Дудко, сакратар раённага аддзела БРСМ, раздаваў майкі і сцяжкі з адпаведнай сімволікай і заклікаў актыўна падтрымліваць выканаўцаў у іх “за-беларускіх” намаганнях. Гэтым і займаліся актывісты з 16.00 да 19.00 гадзінаў.
Майкі і сцяжкі пасля канцэрта Віця адабраў.

“Халадэча ў вас тут аднак. Нягледзячы на танны газ ”, - апранаючы паўгадзіны таму скінуты плашч, дзівіўся Аляксандр Казулін. У актавай зале Райспажыўтаварыства, дзе 4 сакавіка адбылася сустрэча кандыдата ў прэзідэнты РБ з выбаршчыкамі, насамрэч было няцёпла, хаця людзей сабралася больш за тую колькасць, на якую разлічана памяшканне.

Дзюдо
Шэсць прызавых месцаў заваявалі выхаванцы смаргонскай СДЮШАР №1 на міжнародным турніры сярод юніёраў да 20 гадоў, які адбыўся 17-19 лютага ў Магілёве.
Аляксандр Вахавяк стаў пераможцам. Сярэбранымі прызёрамі сталі Аляксандр Сташкевіч, Лідзія Андронава і Кацярына радзевіч. Трэція месцы занялі Таццяна Серык і Руслан Грышкевіч.

У вёсцы Выгаляненты Вішнеўскага сельсавета на пажары ў ноч з 17 на 18 лютага загінуў 32-гадовы мужчына. Па словах суседзяў, ён у гэты дзень у сваёй хаце выпіваў разам са знаёмымі. Прычыны пажару высвятляюцца.